Það gerðist ýmislegt fleira

Ég skellti mér að sjálfsögðu á knattspyrnuleik í gær og sá Skagamenn kljást við Keflvíkinga. Leikurinn var vægast sagt hundleiðinlegur fyrstu 80 mínúturnar en síðustu 16 mínúturnar eru þær skrítnustu sem ég hef séð í íslenskri knattspyrnu.

Bjarni Guðjónsson skoraði "óvart" mark og allt varð vitlaust á vellinum. Keflvíkingar gerðu mikinn aðsúg að Bjarna og vildu svo í kjölfarið að Skagamenn myndu gefa sér mark. Eftir á að hyggja fannst mér það hárrétt ákvörðun hjá Skagamönnum að halda leiknum áfram á fullu. Í dag var grafið upp myndband af svipuðu atviki úr Hollensku knattspyrnunni. Ég er alveg sammála að þetta eru sambærileg atvik. Markið skorað með langskoti yfir markmanninn og skotmaðurinn sýnir í báðum tilfellum iðrun um leið og ljóst er að knötturinn hafnar í markinu.

Það sem er aftur á móti ólíkt með þessum tveimur atburðum eru viðbrögð liðsmanna liðanna sem fá markið á sig. Í Hollenska leiknum þá röltir einn leikmaður sér að "gerandanum" og er greinilega ekki sáttur. Uppi á Skaga þá varð nánast ALLT Keflavíkurliðið stjörnuvitlaust og réðst á Bjarna. Finnst fólki sanngjarnt að ætla að gefa þeim mark eftir þá framkomu. Hefðu menn hegðað sér almennilega þá er líklegra að betur hefði farið.

Skoðið sjálf

Markið á Skaganum

Markið í Hollandi

Það er eitt sem alveg gleymist í allri þessari umræðu en það er SLÁTRUNIN sem Bjarni varð svo fyrir seinna í leiknum. Ég fullyrði það að þjálfari Keflavíkur sendir Einar Orra inn á völlinn til að ganga frá Bjarna. Það eina sem þessi drengur gerði var að tækla Bjarna á þann máta að það var einungis heppni að hann skyldi ekki stórslasast.

Af hverju var þessi drengur ekki dreginn í viðtöl í dag og hann beðinn um að útskýra sinn verknað alveg eins og Bjarni var ítrekað tekinn í viðtal til þess að útskýra og biðjast afsökunar á þessu óvilja verki sínu? Og af hverju er ekki komið myndband af þeim atburði inn á kvikmynd.is og á fotbolta.net.

Ég get vel skilið að Keflvíkingar séu reiðir. Ég væri það svo sannarlega ef mitt lið hefði fengið svona mark á sig. En það hvernig Keflvíkingar  hafa hegðað sér í kjölfarið á þessu er til svo mikillar skammar fyrir félagið að það er engu lagi líkt. Ég átti von á því að stjórnarmenn Keflvíkinga myndu sjá sóma sinn í því að reyna að sjatla málið og biðjast afsökunar á sinni hegðun líkt og stjórn ÍA gerði. En NEI, þeir í staðinn ausa olíu á eldin og eru alveg saklausir í öllu þessu máli. Þjálfari Keflvíkinga og Guðmundur Steinarsson, leikmaður Kefvíkinga koma í sjónvarpið og ausa svívirðingum yfir Skagamenn og öllum finnst það bara í lagi. Þetta finnst mér til skammar fyrir Keflavík.

Að lokum vil ég líka minnast á atvikið þegar Páli Gísla markmanni Skagamanna var vikið af leikvelli. Ef einhver maður sýndi óheiðarlega framkomu á Skaganum í gær þá var það sá leikmaður sem að Palli braut á. Það er ljóst að Palli stjakaði við leikmanninum og hefur kannski verðskuldað rauða spjaldið þó að mínu mati hefði gult alveg dugað. En það var ansi sorglegt að horfa upp á það í sjónvarpinu að Keflvíkingurinn engdist um að kvölum í markinu en var alltaf að fylgjast með Palla og Kristni dómara. Um leið og Kristinn lyfti rauða spjaldinu þá spratt Keflvíkingurinn upp með glott á vörum. Ég myndi alveg vilja fá myndband af því á kvikmynd.is

Yfirlýsing frá ÍA

Athugasemdir

[grétar (IP-tala skráð) 5.7.2007 kl. 21:51]

"Finnst fólki sanngjarnt að ætla að gefa þeim mark eftir þá framkomu"

Þú ert búinn að snúa "fair play" reglunni við. Það var ekki skagamanna að velja úr að sýna sanngirni eða ekki. Þeir sýndu af sér hróplega ósanngirni og höfðu tækifæri til að skríða út úr skömminni og verða meiri menn af fyrir vikið. Þeir gerðu það ekki. Þar stendur málið í dag.

Allt krafs yfir þessa staðreynd er jafn sorglegt og það sem á eftir fylgdi í leiknum og eftir hann. Á þeim atvikum getur aganefnd KSÍ tekið en ekki þessari lúalegu hegðun skagamanna.

[Gísli Sigurðsson, 5.7.2007 kl. 22:01]

Ég er alveg sammála að tæklingin á Bjarna var dálítið skuggaleg en að ætla Kristjáni það að hafa sent leikmanninn inn á völlinn gagngert til að ganga frá Bjarna er auðvitað ekki svaraverð. Munurinn á þessari tæklingu og þeirri sem leikmaður Keflavíkur varð fyrir í leik á móti Vestmannaeyingum fyrir 2 árum og er líklega ekki búinn að bíta úr nálinn með þau meiðsli sem hann hlaut þar ,er sá að Bjarni var með fótinn á lofti sem gerir meiðslahættuna miklu minni en í fyrra tilfellinu stóð leikmaðurinn í fótinn þegar hann fékk 2ja fóta tæklinguna á sig. Og nota bene Vestmannaeyingurinn fékk annað hvort aðeins gult eða ekki neitt spjald fyrir sitt brot. 

[Grímur Kjartansson, 5.7.2007 kl. 22:28]

Afsökunabeiðni ÍA er brandari.
Við biðjumst afsökunar en þetta er nú samt allt ykkur að kenna.

[Bjarni (IP-tala skráð) 6.7.2007 kl. 00:07]

Ég held að nafni minn muni gefa Keflvíkingum mark í upphafi leiks í síðustu umferðinni en bara ef Keflvíkingar sjá að sér  

Verð samt að segja að Keflvíkingar fóru "aðeins" yfir strikið í gær.  Bjarni gerði mikil mistök en hvað Keflvíkingar gerðu segir meira um þá!! 

Það er ekki ennþá búið að rifja upp markið sem Móði skoraði fyrir KR um árið!!  Var það ekki annars Móði og mig minnir að það hafi verið á móti Víkingum... samt ekki Keflvíkingum!  Þá varð allt brjálað líka... samt ekki eins brjálað enda maðurinn tröll að vexti og lögga að auki.  Getur ekki einhver fundið það mark?  Skora á þig Kristleifur að finna það eins og með Ajax.  Mjög gott framlag.

[bjarni (IP-tala skráð) 6.7.2007 kl. 00:12]

Fór að rifja þetta aðeins upp og það var Rikki Daða sem skoraði en Þormóður sendi boltann á hann.  KR- Fram.

[Magnús Þór Jónsson, 6.7.2007 kl. 00:26]

Kristleifur.

Hvaðan færðu það að þjálfari Keflavíkur sendi menn inn til að meiða?

Þú vonandi áttar þig á því að það er refsivert athæfi gagnvart íslenskum lögum og þú ert því að ásaka Kristján um eitthvað sem hægt er að dæma hann í héraðsdómi og Hæstarétti!

Svo má nú líka benda þér á að umræddur drengur er leikmaður 2.flokks Keflavíkur að leika sinn fyrsta leik í sumar og því miður ekki með reynslu af slíkum hasar.

Mér skilst svo að foreldrar hans slái nú um hann varnarskjöld, eins og sannir foreldrar gera.  Aðrir fara jú í viðtölin með sínum börnum, auk þess sem við skulum ekki gleyma því að enginn fer í viðtal nauðugur?

En ég vona að þú og aðrir Skagamenn verðið menn til að leggja fram kæru til lögreglunnar um dónann Kristján sem skipuleggur árásir í miðjum knattspyrnuleik.

Þetta finnst mér það allágkúrulegasta sem fram í málinu hefur komið, og ber þar margt við!!!